اینانیردیق گئجه دن دان چیخاجاق قارشیمیز

شعر



گولوشون ساعاتلی بومبادیر
اوزه ریمده آچیلیر

گوزله رین داشییا بیلمه دییم سوزله ری آنلادیر

گولوشون
تبریز گئجه له رینین آغیرلیغیدیر

گوزله رین
تانیا بیلمه دییم چئشمه لردن سو ایچیر

نه اولار
بیر آنلیق اولسادا دورر

واراق لا کیم لیینی

بوراخ 25 ایل گئریده قالانلاری

بوراخ تیریبون آرخاسینا گئچن له ری

آلدانما
تانریدان خبرسیز دوغولانلارا!

چرشابین قادینلیق
اوتاغین دوستاق نیشانه سیدیر

اوتور
آچ اونونه ناظیمین شئعیر له رینی

اومودسوز اولارکن
دوستاق دادا
آزادلیقین نه اولدوغونو آنلا

بوش وئر حایاتی
تورپاق
یئرین باشینا اله نه ن تورپاق دیر

داغلار
یئرین باشینا دوشن داش لاردیر

بیلیرم
اینجیدیر دوشونجم سنی
 
اما
گوزله رین

سئوگی آدلی آلما آغاجیدیر
اوره ییمده بیتمیش
آزدیرماسن شیطان سنی
اونوت حوانین کیم اولدوغونو

آل اووجلارینا اوره ییمی
یئتیم بیر کورپه دیر اوره ییم
تکجه سنین اوچون چیرپینیر


+نوشته شده در سه شنبه دهم اردیبهشت 1392ساعت16:14توسط mehdi azimi | |

سنی گوردویوم آن

اونوتدوم دونیانین هاراسیندا اولدوغومو

باشقا بیر حایات دوغولدو گوزلریمده

نه ایشیغی بللی

نه قارانلیغی

زامانلا اویناییردی حوکوم دارلار

نه بیلیم

بلکه ده

بهشتیله جهنم اورتاسیندا سئودیم سنی...

من داشدان یونولموشام

نه دن دالمیسان گوزله ریمه؟

باخیشلارین اینقیلاب

گوزلرین بومبا

یوم گوزله رینی

یوخسا

4

3

2

پاتلایار ایچیمده کی چوروموش سورغولار

داغیلار دونیایا گیزلین فیکیرله ر...

باخیشین جوخ سویوق دور

دوندورور منی

بولواردا شهریارین دونموش هئیکلی کیمی

اوشویورم

چارشابینی یوخ

اورت اوستومه آذربایجانی

قوی باشیما سهندین پاپاغین

دوشونمک ایستییرم نه چکدیکله رینی

بو سئوگی اوغوتمایاجاق منی

اوغوتمایاجاق سنی

بیلیرم

فیکریم چوخ داغما داغیندیر

فیکریم بلکده بوغولان کورپه

خیاوانلاردا ال لنن قادین

اون قاتدان یئره دوشن شاعیر...

بوراخ منی

دوغولوب ایچیمده باشقا بیریسی

گیزلینده بسله دیم اونو اینسانلاردان

آتامدان

آنامدان

گونش قفسینده ن

منه بنزمیر اما

هئچ کیمه بنزمیر

تکجه یالقیزلیقدان باشقا

سفیل سرگردان گزیرم خیاوالاری

فحله میدانینا گئتملییم

باغیشلا گئتملییم

گئدیرم شئعیر له ریمه سیغینام...

+نوشته شده در سه شنبه دوم آبان 1391ساعت21:39توسط mehdi azimi | |